Gipalambo pa sa Kagamhanang Dakbayan sa Sugbo ang gitukod nga Cebu City Special Price Monitoring and Consumer Protection Body aron sa mas lig-on nga pagbantay sa lihok sa presyo sa mga palaliton sa dakbayan.
Kini ang gipamulong ni Cebu CIty Mayor Nestor Archival Sr. atol sa pakighinabi niini sa mga sakop sa tigbalita niadtong Lunes, Marso 23, 2026.
Sumala pa sa mayor nga sa mga naninda og mga batakang pangihanglanon sa syudad susama sa bugas kay nagtuman ra gihapon sila sa makatarunganon nga presyo.
Gipasalig niini nga ang price monitoring team kay striktong nag-inspeksyon sa sitwasyon sa kamerkadohan ug uban pa aron sa pagprotektar sa mga konsumidor nga hilabihang naapektohan sa grabeng krisis sa ekonomiya sa kalibutan mugna sa kagubot sa Middle East.
Kahinumduman nga niadtong Marso 12 gitukod sa kagamhanang dakbayan ang price monitoring team nga gilakoban sa mga opisyal sa City Hall ug representantes gikan sa Department of Trade and Industry ug Cebu Chamber of Commerce and Industry aron sa interbensyon sa pamatigayon sa syudad nga nagprotektar sa mga malibogon nga profiteering modus sa pagpanghimulos sa kahigayonan karong panahon sa krisis.
Giawhag sa kagamhanang dakbayan ang publiko nga magbinantayon ug ireprt ang mga kaso sa overpricing or hoarding aron kabahin sa tinguha nga patas ug stable ang kondisyon sa kamerkadohan.
