Gipahibalo ni Pres.Ferdinand Marcos Jr. karung adlawa Biyernes nga aduna pay igo nga suplay sa krudo ang Pilipinas nga molungtad hangtod Hunyo 30, 2026, nga naghatag og kasiguroan taliwala sa nagkadaghang kabalaka sa global oil supply.
Sa pahayag sa Presidente, padayon nga nagbantay ang gobyerno sa lihok sa international oil market aron malikayan ang kakulang sa suplay sa nasud.
Gibutyag usab ni Marcos nga nakighinabi siya sa negosyanteng si Ramon Ang kabahin sa importasyon sa gasolina ug ang posibilidad nga mas palig-onon ang oil refining sa sulod mismo sa Pilipinas.
Matod pa niya, mas epektibo ug mas makabarato kung diri na sa nasud iproseso ang krudo imbis nga mag-angkat og direktang diesel.
Dugang pa sa Presidente, padayon ang pagpangita sa gobyerno og dugang suplay pinaagi sa pakig-alyansa sa dagkong oil suppliers aron mapabiling lig-on ang imbentaryo sa nasud.
Samtang, gipasalig usab sa administrasyon nga magpadayon ang suporta sa mga commuter aron maminusan ang epekto sa pagsaka sa presyo sa lana ug posibleng kakulang niini, ilabina tungod sa tensyon sa Middle East.
