Atol sa ikatulong pulong sa Pito ka Katapusang mga Pulong ni Hesus sa Krus sa Siete Palabras, gipaambit ni Fr. Joselito Gutierrez nga ang manggihunahunaon nga pag-atiman sa kalikopan nagpasabot nga kitang tanan, mga binuhat sa Diyos, konektado. Walay usa kanato nga walay bili.Walay usa nga malimtan. Walay usa nga biyaan.
Dugang ni Fr. Gutierrez, gipakita ni Jesus kanato ang laing dalan. Gikan sa Krus, nagtudlo siya kanato: Ang pag-atiman dili opsyonal. Ang pag-atiman usa ka misyon. Bisan sa pag-antos, mag-atiman kita. Bisan kung dili komportable, mag-atiman kita.
Subay niini, gihandom usab ni Bro. Antonio Jr. and Sis. Irene Bande ang mga nangagi nga makagun-ob nga katalagman sama sa linog ug bagyo.
Busa, gitataw niini nga kung magpadayon sa pagpaputol ug mga kahoy, paglabay og mga basura o mga plastic bisan asa (Throwaway Culture), ug pagtukod og mga subdivision nga walay pagpanalipod sa kinaiyahan, may puruhan nga mobalik pa ang mas grabeng katalagman.
Samtang sa ikaupat nga pulong, giyagyag ni Eduardo Empelis Jr.ang iyang kaagi isip usa ka batan-on nga nag-alagad sa Ginoo pinaagi ra usab sa mga batan-on, apan adunay pangutana siya sa iyang kaugalingon og kung nganung nakabati siya nga gibyaan siya sa Ginoo.
Apan, iyang nasabtan nga kining pulong ni Hesus, nagpahinumdom kanato nga bisan siya, nakaagi usab sa pagbati nga murag gibiyaan.
Dili lang sa matang sa kasakit sa lawas ang iyang gibati, kondili kasakit sa kalag, ug sa tanan niyang giagian, biya, pagpasipala, kasakit, naa gyud higayon nga murag hilom ang Amahan.
