Gisakmit sa mga awtoridad ang gibanabanang ₱1.1 bilyon nga kantidad sa mga peke nga sigarilyo human gironda ang usa ka pabrika sa Lapu-Lapu City niadtong Biyernes, Abril 10, 2026. Sumala sa Police Regional Office 7 (PRO-7), ang maong operasyon nagresulta usab sa pagkasikop sa upat ka mga Chinese national nga gidudahang maoy nag-operate sa ilegal nga pasilidad sa paghimo og sigarilyo.
Gisilbi sa kapulisan ang search warrant sa usa ka bodega nga nahimutang sa Barangay Basak, diin narekober ang liboan ka mga kahon sa sigarilyo nga gituohang naggamit og peke nga tax stamps.
Lakip sa mga nasakmit sa dapit mao ang mga makina sa paghimo og sigarilyo ug nagkalain-laing raw materials nga gigamit sa produksyon.
Gibutyag ni Jose Melencio Nartatez Jr., hepe sa Philippine National Police (PNP), nga ang maong operasyon nagpakita sa gipahugtan nga nationwide campaign batok sa mga ilegal nga kalihukan sa paghimo og produkto nga naglikay sa pagbayad og buhis sa gobyerno.
Gikumpirma usab sa PRO-7 nga ubos na sa ilang kustodiya ang mga dinakpan samtang giandam na ang tukmang kaso nga ipasaka batok kanila.
Nanawagan usab si Nartatez sa publiko ug sa mga nanag-iya og negosyo nga dili suportahan ang maong mga ilegal nga kalihukan.
Giawhag niya ang katawhan sa pagtabang sa pagmonitor ug pagtaho dayon sa bisan unsang kadudahang aktibidad sa ilang dapit aron mapugngan ang pagkaylap sa mga kontrabando.
