CEBU CITY- Napuno sa kalipay ug dakong pasalamat si Engineer Sarah Marielle Aniñon human gipahibalo nga nakasulod siya sa Top 6 sa March 2026 Civil Engineers Licensure Examination—usa ka talagsaong kalampusan nga naghatag ug garbo sa iyang eskwelahan, pamilya, ug sa tibuok Sugboanon nga komunidad.
Sa iyang pakighinabi sa Bombo News Team, gipaambit sa gradwado sa Cebu Technological University nga sa sinugdan, wala gyud niya tuyoa nga mahimong topnotcher.
Matod ni Aniñon, ang iyang mindset sa tibuok review period naka-focus sa pag-excel sa exam aron makakuha ug taas nga marka nga mahimong lig-on nga pundasyon sa iyang propesyonal nga kredensyal sa umaabot niyang pagpanarbaho.
Alang kaniya, bisan dili siya makaabot sa top list, iyang giisip nga ang tarong ug seryosong pag-andam sa exam usa ka paagi aron masiguro ang taas nga performance sa board examination.
Kini nga pamaagi, matod niya, nakahatag kaniya og kusog ug disiplina nga nagpabilin siyang determinado bisan sa mga lisod nga adlaw sa iyang preparasyon.
Tungod sa iyang dedikasyon, gipalawig pa niya ang oras alang sa review ug pagtuon, nga sa katapusan nagbunga sa talagsaong resulta ang iyang pag-apil sa Top 6 sa licensure exam.
Gipasalamatan usab ni Engineer Aniñon ang Ginoo, iyang pamilya, ug mga magtutudlo nga padayon nga naghatag kaniya og suporta, pagdasig, ug inspirasyon sa tibuok niyang panaw.
Sa karon, ang bag-ong Civil Engineer nagplano nga ipadayon ang iyang karera sa structural engineering.
Gitinguha usab niya nga magpadayon sa mas taas nga pagtuon aron mapalapad pa ang iyang kahibalo ug magamit kini sa pagserbisyo sa komunidad pinaagi sa iyang propesyon.
