Gilamoy sa sunog ang 10 ka mga panimalay sa dalan Panganiban, Barangay Pahina San Nicolas ning dakbayan sa Sugbo niadtong Sabado sa hapon, Abril 18, 2026.
Sa taho gikan sa Cebu City Fire Station, walo ka panimalay ang totally damaged samtang duha ang partially damaged. Nakaapektar kini sa 12 ka pamilyahan nga gilangkoban sa 30 ka indibidwal.
Unang nareport ang sunog pag ala-1:32 sa hapon dayon gipasaka sa unang alad pag ala-1:35. Tungod sa kadali sa pagdako sa kalayo, gipasaka kini sa ikaduhang alarma pag ala-1:44.
Hingpit kining nakontrolar pag dayon na alas-2:07 sa samang kahapunon dayon gideklarar nga fireout pag alas-2:28.
Maayo nalang og walay natalang angol ug samdan sa maong panghitabo. Ang balor sa kadoat kay inisyal nga gibana-bana ngadto sa P180,000.
Samtang sa pikas habig, gipamahayag ni Konsehal Nijel Borlasa sa Pahina San Nicolas sa eksklusibong pakighinabi niini sa Bombo Radyo Cebu News Team nga kalit kayo ang panghitabo sa insidente sa sunog sa ilang barangay.
Sa mga istoryang nadawat niini, daw usa ka lalaking kuwang sa pamensar ang hinungdan sa sunog nga kalit lang og nagdaob bisan paman nga gibadlong kini.
Gitumbok pud niini nga ang uga nga kahimtang sa panahon og materyales sa mga panimalay ang usa sab sa mga hinungdan nganong daling mikatap ang kalayo sa mga kasilinganan.
Apan nagpadayag gihapon kii sa iyang pasalamat kay dali kini narespondehan sa mga kabumberohan sa dakbayan kay kung wala pa kay posibleng mas mudako pa ang maong sunog nga mas dakong kadaot ang gipahinabo.
Ila pud gigukod pa nag miikyas nga nagpasiugda sa sunog tungod kay ang mga kadugo ug silingan niini kay kumbinsidong magpasaka og reklamo bahin sa panghitabo.
Sa pagkakaron, gipahimutang usa sa Regino Mercado Elementary School ang mga biktima sa sunog aron matabangan sa Cebu City DSWS samtang nag-clearing operations ang mga awtoridad bahin sa dapit nga naigo sa sunog.
Padayong pahimangno sa mga awtoridad ngadto sa publiko nga kanunayong ipamatasan ang mga kalihokan nga nagpugong sa delubyo sa sunog ug likayan ang pagdaob o pagduwa sa kalayo aron dili musangpot sa trahedya ang kinabuhi.
