CEBU CITY- Nagpahayag og suporta ang kanhi mayor sa Dakbayan sa Sugbo nga si Michael Rama sa bag-ong liderato sa Partido Demokratiko Pilipino–Lakas ng Bayan (PDP), human mapili si Mayor Sebastian ‘Baste’ Duterte isip bag-ong presidente sa partido.
Sa pakighinabi sa Bombo News Team, giingon ni Rama nga dili bag-o sa partido si Duterte, apan karon pa lamang kini gi-full pledge o opisyal nga gisuportahan sa hingpit.
Midugang siya nga ang kabatan-on ug kasinatian ni Duterte sa lokal nga panggamhanan makatampo sa paghatag og bag-ong kusog ug direksyon sa partido.
Matod pa niya, lig-on ang background ni Duterte sa public service ug adunay kahibalo sa grassroots governance, hinungdan nga haom kini sa pagpangulo sa PDP sa pagkakaron.
Si Rama, nga nagsilbi usab isip Vice President for the Visayas sa PDP, miila nga ang kausaban sa nasyonal nga liderato mahimong makaapekto sa lokal nga alyansa, ilabi na sa Kabisay-an. Bisan pa niini, naglaum siya nga magpadayon ang lig-on nga kooperasyon sa mga miyembro sa partido.
Gihatagan usab niini og gibug-aton ang kahinungdanon sa panaghiusa ug klarong direksyon aron epektibong mapatuman ang mga plano sa lokal nga lebel.
Mahitungod sa pagbiya ni Robin Padilla isip presidente sa PDP aron magpokus sa iyang katungdanan sa Senado, gihulagway kini ni Rama nga usa ka praktikal nga lakang.
