Nagpahigayon og sunod-sunod nga mga kalihokan ang mga miyembro sa Carbohanong Alyansa, nga gilangkuban sa nagkalain-laing grupo ug sektor gikan sa Carbon Public Market ug Sitio Bato sa Barangay Ermita, Dakbayan sa Sugbo, kinsa dakong supak sa giingong privatization sa Carbon Public Market
Gilunsad sa grupo ang “Save Carbon Market Movement” pinaagi sa usa ka Misa sa Basilica Minore del Santo Niño niadtong Lunes, Abril 27, 2026, gisundan sa usa ka martsa padulong sa Carbon Public Market aron ipaabot ang ilang mga reklamo.
Nanawagan usab ang grupo sa suporta dili lamang gikan sa mga Cebuano apan lakip usab sa mga stakeholder sa Luzon ug Mindanao nga nagsalig sa mga produkto gikan sa merkado, nga nag-ingon nga ang tanang sektor maapektuhan sa giingong privatization.
Dugang nilang giawhag ang Cebu City Council nga susihon pag-ayo ang Joint Venture Agreement (JVA) tali sa lokal nga gobyerno ug sa Cebu 2 World, kay nangatarungan sila nga ang mga vendor ug konsumidor ang naa sa “disadvantaged” ubos sa kasabutan.
Subay niini, eksklusibong gikuha sa Bombo Radyo Cebu news team ang habig ni kanhi presidente sa Cebu Market Vendors Multipurpose Cooperative (CEMVEDCO) nga si Erwin Goc-ong Sr., diin matod niya, gihangop ug dako nilang kalipay sa pagduso og resolusyon ni Cebu City Councilor Sisinio “Bebs” Andales nga ipa-review ang JVA, ingun man nga gikalipay usab nila ang pag-amendar ni Cebu City Councilor Joel Garganera nga buot ini nga i-agi sa 3 ka committee; Committee on Market, Committee on housing, ug Livelihood and Laws Committee.
