Gipaubos sa house arrest ang kanhing lider sa Myanmar nga si Aung San Suu Kyi human sa kapin lima ka tuig nga pagkabilanggo sukad sa kudeta sa militar niadtong 2021.
Sa pamahayaga sa military leader nga si Min Aung Hlaing nga gipagaan ang nahabilin niyang sentensya ug gibalhin siya sa “designated residence,” nga epektibong house arrest.
Gipakita sa state media ang litrato sa 80-anyos nga si Suu Kyi nga naglingkod uban sa duha ka opisyal, apan limitado gihapon ang impormasyon sa iyang tinuod nga kahimtang.
Ang iyang anak nga si Kim Aris nagduhaduha ug miingon nga walay klarong ebidensya nga buhi ug maayong panglawas siya, ug giingon nga daan pa ang litrato.
Samtang, ang iyang legal team miingon usab nga wala silay nadawat nga opisyal nga pahibalo sa pagbalhin.
Si Suu Kyi, kinsa gihatagan sa Nobel Peace Prize niadtong 1991, nahimong simbolo sa kalihukang pro-democracy sa Myanmar ug unang napili niadtong 2015 human sa mga reporma sa nasud.
Ang iyang sentensya nga moabot na unta og 33 ka tuig, balik-balik nga gipakunhod, ug giingon sa mga analista nga posibleng lakang kini sa junta aron makunhuran ang international isolation.
