CENTRAL VISAYAS- Gikompirmar ni General Potenciano Camba, Deputy Director General for Operations sa ASEAN 2026 National Organizing Council (NOC), nga 100 porsyento nang andam ang seguridad ug tibuok preparasyon alang sa ASEAN Leaders’ Summit 2026 nga pagahigayonon sa Sugbo sa Mayo 7 ug 8.
Sa eksklusibong pakighinabi sa Bombo Newsteam, gipahayag ni Camba nga sukad pa lamang nga gidawat sa Pilipinas ang responsibilidad sa pag-host sa maong internasyonal nga kalihokan, padayon na ang maampingon nga preparasyon ug pagpangandam sa security sector ug ubang ahensya sa gobyerno.
Matud niya, ang maong summit dili lamang kalihokan sa gobyerno, kundili usa ka “whole-of-nation effort,” diin gikinahanglan ang suporta ug partisipasyon sa tanang Pilipino aron masiguro ang malampuson ug luwas nga pagdawat sa mga lider ug delegado gikan sa 11 ka member states sa ASEAN.
Gipasabot ni Camba nga magsugod na ang pag-abot sa mga advance party ug delegado, samtang ang mga lider sa ASEAN gilauman nga moabot sa Sugbo sa Mayo 6 ug 7.
Ang serye sa ministerial ug leaders’ meetings himuon sa Mayo 7 ug 8, diin ang pangunang lugar sa kalihokan anaa sa Lapu-Lapu City.
Tungod niini, ipatuman ang istriktong security ug traffic control measures aron masiguro ang hapsay nga paglihok sa mga bisita gikan sa airport padulong sa ilang mga hotel ug sa meeting venues.
Gihangyo usab niya ang publiko sa pagsabot ug kooperasyon sa posibleng temporaryong abala sa trapiko, ilabina sa mga lugar nga pagagian sa mga delegado.
Bisan pa niini, giingon ni Camba nga dakong dungog alang sa Sugbo nga napili isip host city sa maong summit, taliwala sa daghang mga siyudad sa Pilipinas.
Matud niya, kini usa ka higayon aron ipakita sa kalibutan ang katahum, kaandam, ug kapasidad sa Sugbo isip internasyonal nga destinasyon.
Nanawagan usab siya sa mga Sugboanon nga maghiusa ug ipakita ang ilang mainiton nga pagdawat sa mga bisita.
Gituohan sa mga otoridad nga ang malampusong pag-host sa ASEAN Leaders’ Summit makahatag og dugang oportunidad sa turismo, ekonomiya, ug internasyonal nga reputasyon sa Sugbo ug sa tibuok nasud.
