Nagsugod na sa Sandiganbayan ang pangunang husay sa kasong malversation batok kang kanhi Senador Ramon “Bong” Revilla Jr. ug sa iyang mga kaubang akusado, karung adlawa Martes, Mayo 5.
Ang kasong non-bailable naggikan sa giingong ghost flood control project sa Pandi, Bulacan nga nagkantidad og P92.8 milyon.
Sumala ni Associate Justice Ronald Moreno, giaprobahan sa korte ang mosyon sa prosekusyon nga ipatawag balik si Jason Cruz, records custodian sa Department of Public Works and Highways (DPWH), aron motestigo.
Miingon si Prosecutor Maria Cristina Marallag-Batacan nga si Cruz mopresentar og logbook nga naglangkob sa mga importanteng ebidensya nga may kalabotan sa maong mga proyekto.
Gilauman nga ipagawas ang desisyon sa petisyon sa piyansa ni Revilla karong Miyerkules, Mayo 6.
Ang kanhi Senador kaniadto mihimakak sa bisan unsang kalambigitan sa giingong anomalosong proyekto.
Gihatagan na si Revilla og piyansa sa usa ka kasong graft, apan nagpabilin siyang na-detain tungod sa non-bailable malversation case.
