Gitubag ni Presidential Communications Office Undersecretary Claire Castro si Bise Presidente Sara Duterte human siya gitawag og “papansin,” ug giingon nga murag kulang sa pag-research ang pipila ka pahayag niini may kalabotan sa kasamtangang isyu sa gobyerno ug politikal nga mga pamahayag.
Ang pamahayag gihimo atol sa ika-duhang adlaw sa ASEAN Leaders Summit 2026 sa Lapu-Lapu City Cebu.
Matod ni Castro, ang pipila ka komento sa Bise Presidente bahin sa sitwasyon sa nasud nagpakita og kakulang sa aktuwal nga pagsubay sa mga development.
Iyang giingon nga base sa naunang pahayag ni Duterte nga dili siya kahibalo mogamit og computer, posible nga nakaapekto kini sa iyang abilidad sa pag-access ug pagsubay sa kasamtangang impormasyon.
Giklaro usab sa opisyal nga ang iyang mga tubag resulta lamang sa mga pangutana sa media ug dili personal nga pag-atake batok sa Bise Presidente.
Giinsister niya nga padayon ang administrasyon sa pagtrabaho aron sulbaron ang mga isyu sa ekonomiya, trabaho, ug pambansang utang isip kabahin sa nagpadayon nga mga programa sa gobyerno.
Gipasiugda usab ni Castro ang kamahinungdanon sa pagpaminaw sa gobyerno sa mga reklamo ug opinyon sa publiko, ilabi na sa implementasyon sa mga programa ug proyekto nga nagserbisyo sa katawhan.
Ang maong isyu mitumaw human sa pagsaway ni Bise Presidente Sara Duterte kang Palace Press Officer Claire Castro, kalabot sa iyang mga pamahayag bahin sa giingong kaandam niini nga modagan sa pagka-presidente sa 2028.
