Gipahibalo sa International Criminal Court (ICC) gabii nga “walay mga public arrest warrant” nga gi-isyu kalabot sa Philippine war batok sa kaso sa droga nga ilang gidumala.
Ang pahayag migawas human sa mga balita, nga nagkutlo sa mga wala mailhing tinubdan, nga ang internasyonal nga korte nag-isyu og warrant aron dakpon si Senador Ronald Dela Rosa, ug giingong gipahibalo na ang International Criminal Police Organization (Interpol) kabahin niini.
Sa gipadala nga text message ni Oriane Maillet sa mga tigbalita nga walay mga public arrest warrant nga gi-isyu kalabot sa sitwasyon sa Pilipinas.
Ingon man nga midumili siya sa pagkomento sa dihang gipangutana aron kumpirmahon kung ang prosekusyon sa ICC nagsang-at na og aplikasyon alang sa warrant batok kang Dela Rosa, ug kung ang pahayag nagpasabot ba nga adunay warrant apan wala pa gibutyag sa publiko.
Ang ICC Office of the Prosecutor kaniadto naghingalan kang Dela Rosa, uban sa pito pa, isip mga kauban sa mga pagpatay nga nahitabo atol sa kampanya batok sa ilegal nga droga sa Pilipinas.
Sa usa ka dokumento sa korte nga gipetsahan og Pebrero 13, ang Deputy Prosecutor sa ICC nga si Mame Mandiaye Niang miingon nga ang nadakpan nga kanhi presidente nga si Rodrigo R. Duterte ug ang giingong mga kauban nga naghimo niini “nag-ambit og usa ka common plan o kasabutan aron ma-neutralize ang giingong mga kriminal sa Pilipinas.
Si Dela Rosa, kinsa mao ang unang hepe sa Philippine National Police ni Duterte, wala na motungha sa Senado sukad Nobyembre 2025 human migawas ang mga report nga siya dakpon.
Si Duterte gidakop sa mga awtoridad sa Pilipinas ubos sa maong warrant niadtong Marso 11, ug gisurender sa ICC niadtong Marso 12.
