CENTRAL VISAYAS- Mibotar og “NO” sa impeachment complaint batok kang Bise Presidente Sara Duterte ang tulo ka kongresista gikan sa Cebu, duha ka kongresista gikan sa Bohol, ug usa ka partylist representative, sumala sa opisyal nga tally sa Kamara.
Lakip sa mga nibotar og kontra mao sila si Congresswoman Rachel “Cutie” Del Mar sa Cebu City North District, Congresswoman Karen Hope Garcia sa Cebu 3rd District, ug Congressman Sun Shimura sa Cebu 4th District.
Sa iyang pahayag, giingon ni Del Mar nga ang iyang desisyon nagpakita sa iyang pagsunod sa kabubut-on sa iyang mga konstituwente, ug iyang gipakita nga ang iyang baruganan nga “NO” sa ika-19 nga Kongreso magpadayon usab sa ika-20 nga Kongreso.
Si Garcia mipasabot nga iyang gisalikway ang impeachment resolution human sa pag-apil sa sunod-sunod nga proseso sa Kamara, nga iyang gihulagway nga “sui generis” o kombinasyon sa legal ug politikal nga kinaiya.
Samtang si Shimura mipadayag sa social media nga iyang gibarogan ang iyang boto nga “NO,” ug nagpasalamat sa pagsalig sa mga botante sa iyang distrito.
Sa Bohol, si Congressman Van Van Cadorna Aumentado sa ikaduhang distrito mibotar og “NO,” nga nag-ingon nga ang iyang desisyon gi-base sa tingog ug sentimento sa iyang mga konstituwente.
Gidugangan kini ni Rep. Kristine Alexie Tutor sa Bohol 3rd District, nga mipasabut nga ang kadaghanan sa iyang mga konstituwente naghatag og prayoridad sa ekonomiya, kalinaw, ug kaluwasan sa publiko imbes sa impeachment proceedings.
Si Congresswoman Girlie E. Veloso sa Malasakit@Bayanihan Partylist mibotar usab og “NO,” ug mipasiugda nga ang serbisyo publiko kinahanglan magpabilin nga nakatutok sa mga dinaliang kabalaka sa katawhang Pilipino.
