Gibasura sa Korte Suprema ang mosyon ni Senador Ronald “Bato” Dela Rosa nga nangayo og Temporary Restraining Order (TRO) aron mapugngan ang mga awtoridad sa pagpatuman sa warrant of arrest gikan sa International Criminal Court (ICC).
Sa special en banc session sa Korte Suprema, ang mga mahistrado mibotar og 9-5-1 pabor sa pagbasura sa hangyo sa senador.
Sumala sa Korte Suprema, ang desisyon nagtumong lamang sa mga interim relief sama sa TRO ug Status Quo Ante Order, ug wala pa masulbad ang pangunang isyu sa kaso.
Samtang, kusganong gibarugan usab sa Malacañang nga ang mahimo na lang ni Presidente Ferdinand Marcos Jr. karon mao ang pagsunod sa balaod ug pagsunod sa lagda sa balaod.
Mao kini ang tubag ni Palace Press Officer USec. Claire Castro kalabot sa apela ni Senador Ronald “Bato” Dela Rosa niadtong miaging semana kang Presidente Marcos nga protektahan siya isip usa ka lungsuranong Pilipino.
Sumala ni Castro, basi sa mga komento sa Office of the Solicitor General (OSG) sa Korte Suprema, ang warrant of arrest batok kang Dela Rosa dili na kinahanglan nga moagi sa lokal nga korte.
Samtang, hugot nga gihimakak ni Department of the Interior and Local Government (DILG) Secretary Jonvic Remulla nga ang video nga ilang gipagawas bahin sa giingong pagbiya ni Dela Rosa sa Senado gi-splice o gi-edit.
Gikumpirmar usab ni Remulla nga ang tulo ka indibidwal giingong nagsakay sa usa ka puti nga SUV nga narehistro kang Senador Robin Padilla, basi sa mga rekord gikan sa Land Transportation Office (LTO).
