Namatay ang labing menos 23 ka tawo ug 71 ang naangol human sa usa ka suicide bombing duol sa usa ka estasyon sa tren sa Quetta, usa ka siyudad sa habagatang-kasadpang Pakistan, matod sa mga awtoridad.
Ang inisyal nga imbestigasyon sa kapolisan nagpakita nga usa ka suicide attack ang nahitabong pagbuto samtang niagi ang tren.
Gikataho nga grabeng kadaot ang nahimo sa pagbuto sa maong lugar, diin daling miresponde ang mga rescue team alang sa dinalian nga operasyon.
Gi-lockdown sa mga awtoridad ang dapit samtang ang mga bomb disposal unit ug security personnel nagpadayon sa pagsusi sa mga sirkumstansya sa pag-atake.
Sumala sa mga rescue official, gawas sa 23 ka mga patayng lawas nga narekober, dose-dosenang mga nasamdan nga pasahero ang gidala sa nagkalain-laing ospital.
Gipaubos sa state of emergency ang mga ospital sa Quetta aron maatiman ang pagdagsa sa mga biktima.
Si Deputy Superintendent of Police Qadir Qambrani nagkanayon nga mahimo pang mosaka ang ihap sa mga nangamatay ug naangol, sumala kaniya, kapin sa 100 ka mga indibidwal ang gituohang naapektuhan sa pagbuto samtang nagpadayon pa ang verification.
Miangkon sa responsibilidad sa pag-atake ang militanteng grupo nga Baloch Liberation Army (BLA).
Gikondenar ni Pakistani Prime Minister Shehbaz Sharif ang insidente, ug gitawag kini nga usa ka brutal nga buhat sa terorismo nga dili makapahuyang sa determinasyon sa nasod.
Samtang si Interior Minister Mohsin Naqvi mibiyahe paingon sa Quetta human sa trahedya aron makigkita sa mga lokal nga opisyal ug maghatag og suporta sa mga pamilya sa biktima.
