Wala nagrekomendar ang Opisina sa Ombudsman og piyansa alang kang Sen. Jinggoy Estrada sa pagpasaka og kasong plunder batok sa senador kalabot sa flood control scam.
Matud ni Assistant Ombudsman Mico Clavano nga ang imbestigasyon nagpakita nga mokabat sa kapin P573 milyon nga kickback ang sistematikong gihatag kang Estrada, human kini maabswelto sa pork barrel scandal.
Samtang, gikumpirma ni Interior Secretary Juanito Victor “Jonvic” Remulla nga nakigsulti na siya kang Senador Estrada kabahin sa posibleng mga lakang sa senador human sa gipaabot nga pag-isyu sa warrant of arrest gikan sa Sandiganbayan.
Sumala ni Remulla, ilang gihisgutan ang posibleng mga “option” human sa pagpasaka sa Office of the Ombudsman og mga kasong plunder ug graft batok sa senador tungod sa giingong mga iregularidad sa mga proyekto sa pagkontrol sa baha ug giingong ilegal nga pagsal-ot sa budget sa Department of Public Works and Highways (DPWH).
Bisan pa, ang kalihim midumili sa pagpahibalo sa publiko sa mga detalye sa nahisgutang mga opsyon, nga nag-ingon nga kini magpabiling pribado hangtod nga dawaton o isalikway kini ni Estrada.
Samtang, si Sen. Jinggoy miingon nga gamiton sa iyang kampo ang tanang legal nga remedyo aron kuwestiyonon ang mga kaso nga gisang-at batok kaniya.
Gikutlo usab ni Estrada ang usa ka sulat gikan sa Senate Legislative Budget Research and Monitoring Office (LBRMO) nga nag-ingon nga wala siyay gihimo nga bisan unsang pagsal-ot sa badyet sa 2025 national budget.
Sumala ni Assistant Ombudsman Mico Clavano, ang mga kaso naggikan sa giingong sistematikong proseso sa ilegal nga pagsal-ot sa badyet ug mga proyekto sulod sa portfolio sa imprastraktura sa DPWH alang sa tuig piskal 2025.
Dugang niya nga ang mga pondo giingong tinuyo nga gigahin baylo sa mga komisyon o kickback sa pinili nga mga proyekto sa gobyerno.
