Wala na makapalag ang usa ka Amerikanong suspek sa dihang gi-raid sa National Bureau of Investigation ang iyang condo unit sa Cebu City tungod sa giingong child exploitation.
Duha ka batang lalaki, nag-edad og 10 ug 15, ang naabtan sulod sa condo atol sa operasyon. Sumala sa NBI, nakadawat sila og impormasyon nga ang langyaw giingong pasudlon ang mga menor de edad sa iyang unit baylo sa kwarta.
Sumala sa tigpamaba sa NBI-7 nga si Maria Contessa Lastimoso, “Mo-imbitar siya og mga bata nga may bayad aron mouban kaniya sa iyang condominium unit.”
Dugang niya nga ang suspek giingong naghatag sa mga bata og tali sa P1,000 ug P1,500, samtang adunay dugang bayad kung mouban sila kaniya sa mall.
Matod niya, “Ang usa ka libo nagpasabot og pag-sleep over uban kaniya sa iyang condominium unit ug pagligo uban kaniya.”
Kadaghanan sa mga biktima nahimamat lang sa suspek pinaagi sa social media. Giimbestigaran usab sa mga awtoridad kung ang pipila sa mga ginikanan sa mga bata responsable o kakunsabo sa krimen.
Naalarma usab ang NBI sa giingong kaylap nga pagbugaw sa mga menor de edad sa lugar.
Sumala ni Lastimoso, kadaghanan sa mga nalambigit mga miyembro sa 4Ps ug nakadawat na og tabang gikan sa LGU, apan gibaligya gihapon nila ang ilang mga anak.
Ang mga bata anaa na karon sa pag-atiman sa DSWD samtang naghulat sa pagpasaka og kaso batok sa suspek.
