Gilunsad sa Cebu Provincial Government ang usa ka inisyatibo sa modernisasyon aron mapalig-on ang kapasidad sa lalawigan sa pagtubag sa mga natural ug hinimo sa tawo nga mga katalagman.
Sumala ni Gov. Pam Baricuatro, kabahin kini sa paningkamot sa pagpauswag sa kalig-on batok sa kalamidad pinaagi sa pagpalambo sa imprastraktura sa emerhensya, pagsangkap sa mga responder, ug pagpalapad sa mga programa sa pagpangandam sa komunidad.
Gipadayag ni Ret. Col. Dennis Francis Pastor, focal person sa Cebu Provincial Disaster Risk Reduction and Management Office (PDRRMO), nga duha ka abante nga sistema ang na-instalar na sa PDRRMO Command Center sa Barangay Apas, Cebu City.
Lakip niini ang usa ka solar-powered energy system ug ang digital Emergency Operations Center platform.
Gawas niini, nagsugod na usab ang pagtukod sa mga estratehikong bodega didto sa Danao City ug lungsod sa Sibonga aron mapaspasan ang paghatag og ayuda ug emergency response sa amihanan (north) ug habagatang (south) bahin sa Sugbo.
Dugang pa, nagpalit ang PDRRMO og mga bag-ong rescue equipment, PPE, mga sakyanan sa emerhensya, ug uban pang magamit sa operasyon, samtang nagpadayon usab ang ilang mga seminar ug pagbansay aron mas maandam ang mga komunidad sa panahon sa kalamidad.
