Gipangsapyaw sa mga sakop sa City Environment and Natural Resources Office (CENRO) ug Coastal Resource Management Team sa mga bukya nga nidagsa sa kabaybayonan dapit sa Marigondon Causeway sa siyudad sa Lapu-Lapu.
Gipahigayon kagahapong adlawa, Hunyo 3, ang fish netting operations human nabantayan ang pagdagsa sa daghang Thimble jellyfish—usa ka klase sa bukya nga namatikdan sa kadagatan sa naasoyng lugar.
Apan gawas sa Marigondon Causeway, naobserbahan usab ang pagdagsa sa daghang bukya sa kadagatan dapit sa causeway sa Sta. Rosa sa isla sa Olango sa Lapu-Lapu.
Tungod niini, nagpahimangno si Mayor Cindi King-Chan sa publiko labi na ang mga turista, nga mag-amping ug mag-igmat sa pagpangaligo sa kadagatan sa ilang dakbayan gumikan kay delikado kini sa lawas nga kon maigo niini, moresulta sa tumang pagpangatol sa lawas ug pagpamuwa sa panit.
