Nakabsan sa kinabuhi ang 49 ka tawo tungod sa grabeng kauhaw sa usa ka hilit nga dapit sa disyerto sa Sahara nga sakop sa nasod sa Niger, human naguba ang trak nga nagbiyahe kanila.
Sumala sa gobernador sa Agadez pinaagi sa usa ka post, ang mga biktima lakip sa usa ka grupo sa mga biyahero nga pabalik na unta gikan sa Mali alang sa usa ka Muslim festival sa dihang nahutdan sila og suplay sa tubig.
Natala ang maong trahedya sa usa ka hilit nga dapit nga adunay gilay-on nga kapin sa 80 kilometros sa kasadpan sa Assamaka.
Tungod kay nahutdan na og tubig ug napakyas sa pag-ayo sa sakyanan ang drayber, mga helper, ug mga pasahero, natanggong ang mga biktima sa tunga-tunga sa disyerto taliwala sa naglagiting nga kainit sa panahon ug kakuwang sa suplay sa tubig.
Gumikan niini, daling gilubong ang mga biktima sa usa ka mass grave, dugang sa gobernador.
Luyo sa trahedya, duha ka tawo ang milagrosong naluwas human sila nilakaw og kapin sa 50 kilometros paingon sa labing duol nga tinubdan sa tubig una pa niabot sa Assamaka aron magpahibalo ug mangayo og tabang sa mga awtoridad.
Ang maong disyerto nailhan nga transit point alang sa mga migrante gikan sa nagkalain-laing nasod sa Africa nga mosuway unta og tabok paingon sa Europa, diin daghan na ang natalang namatay tungod sa gutom ug kauhaw sa maong dapit.
