Nangayo og pasaylo ang kanhi Mister Supranational Philippines 2024 nga si Brandon Espiritu sa iyang social media human sa iyang kontrobersyal nga mga komento bahin sa mga contestant sa beauty pageant nga adunay dugong langyaw, o gitawag niya nga “halfies.”
Ang isyu naggikan sa usa ka viral nga panagsultihanay sa Instagram tali ni Espiritu ug sa Filipino-American nga modelo ug pageant titleholder nga si Jether Palomo. Sa mga panagsulti, si Espiritu miingon nga ang Pilipinas maglisod sa pag-apil sa nasudnong pageant kung wala ang mga Pilipino nga adunay dugong langyaw.
Si Palomo, kinsa kanunay nga nagrepresentar sa Pilipinas sa mga male pageant, gikoronahan isip Mister Pilipinas Global 2025 ug nagrepresentar sa nasud sa Mister Global 2025, diin natapos siya sa Top 11. Sa wala pa kini, nailhan usab siya nga grand winner sa usa ka de-latang tuna brand ug first runner-up sa Mister Tourism World 2023 nga gipahigayon sa Brazil.
Misamot ang kontrobersiya human si Palomo mikomento sa linya nga “I pledge allegiance to the flag,” nga nagtumong sa bandila sa Estados Unidos, sa usa ka segment sa pageant diin ang mga contestant miawit sa ilang kaugalingong pinulongan. Si Espiritu mitubag, “Raise that flag brother.”
Usa ka netizen nangutana nganong walay nikanta sa Tagalog bisan pa man og adunay mga contestant nga nagrepresentar sa Pilipinas. Nitubag si Espiritu nga wala sila nagpuyo sa Pilipinas. Sa dihang gisugyot sa netizen nga ang ilang representante kinahanglan nga gikan sa laing nasud, mitubag si Espiritu: “Tell that to all the front runners for the Philippines. This country wouldn’t have a chance on the national stage without us halfies.”
Ang pahayag nakapakurat ug nakapadismaya sa daghang mga netizen, labi na human sa mga bulan nga kagawasan sa Pilipinas, nga nag-ingon nga daw gipakamenos niini ang abilidad sa mga purong Pilipino nga modaog sa mga internasyonal nga pageant.
Lakip sa mga mi-react mao sila si Miss Universe Philippines 2024 first runner-up Stacey Gabriel ug ang inilang Filipino fashion designer nga si Michael Cinco.
Sumala ni Stacey, ang paggamit sa terminong “halfies” nagpalalom lang sa pagkabahin-bahin sa mga Pilipino. Samtang, gisaway ni Cinco ang giingong pamatasan sa pipila ka mga personalidad nga nagpakita og pagkamapahitas-on ngadto sa uban bisan pa sa ilang gigikanan.
Tungod niini, si Espiritu nagpagawas og pahayag aron mangayo og pasaylo ug klaruhon ang iyang mga komento online.
“I am proud to represent the Philippines and proud of my Filipino heritage. The last thing I would ever want is to diminish the accomplishments of Filipinos, whether they are full Filipino, mixed Filipino, or anyone who has had the honor of carrying our flag on the international stage,” matod ni Espiritu.
Iyang gipasiugda nga wala niya tuyoa nga pakamenoson ang mga nahimo sa mga Pilipino nga nagrepresentar sa nasud sa lainlaing mga kompetisyon. Nangayo usab siya sa pagsabot sa publiko ug nangamuyo nga ang iyang mga negosyo, empleyado, ug uban pang mga organisasyon nga may kalabotan kaniya dili iapil kay wala silay kalabotan sa kontrobersiya.
Sa katapusan sa iyang pahayag, gipasalamatan ni Espiritu ang mga misaway kaniya ug miingon nga kini magsilbi nga usa ka importanteng leksyon alang kaniya aron mas masabtan ang epekto sa iyang mga pulong.
