BOMBO EXCLUSIVE: Giila ni former Assistant Coach sa New Era University (NEU) Brian Monday ang mitaliwan nga Nigerian student-athlete nga si Divine Adili dili lamang tungod sa iyang talento sa basketball, kondili sa iyang talagsaong disiplina, kaalam sa eskwela, ug maayong pakigrelasyon sa isigka-tawo.
Sa pakighinabi sa Bombo Radyo Cebu, gipaambit ni Monday ang pipila ka importanteng punto bahin sa hiyas ug legasiya ni Adili.
Matud sa coach, lahi si Adili sa ubang foreign players kay matinud-anon kini sa pagtungha, matinahuron, ug dili sakit sa ulo sa mga magtutudlo.
Gani, gipili niya nga tiwason una ang senior high school sa NEU isip pagpakita sa iyang pagkamaunongon, bisan pa man sa mga tanyag gikan sa mga iladong tunghaan sa UAAP ug NCAA.
Dako ang papel ni Adili sa unang kampyonato sa NEU sa City Recreation basketball tournament pinaagi sa iyang agresibong dula, kakugi sa ensayo, ug pagkamapainubsanon.
Hinungdan nga grabi ang kasubo nga gibati ni Monday sa kalit nga pagpanaw ni Adili, kinsa mibalhin sa Ateneo de Manila University sa ulahing bahin sa iyang karera.
Matod sa coach, dili lang ang mga atleta ang nawad-an, kondili lakip na ang mga magtutudlo ug administrasyon sa NEU nga nakasaksi sa iyang pagkabuotan.
Bisan wala na si Divine Adili, magpabilin sa handumanan sa iyang mga coach, kauban, higala ug sa tibuok New Era University community ang iyang pagkamaunongon, pagkamapainubsanon ug dedikasyon isip usa ka estudyante ug atleta.
Gawas sa basketball, nahinumduman usab sa coach ang kasimple ug pagkamaabiabihon ni Adili.
Matud niya, dili kini mamili og kaon ug andam mosulay sa lokal nga mga pagkaon sama sa bihon, spaghetti ug biko sa dihang gidapit niya kini sa selebrasyon sa birthday sa iyang inahan.
May kalabotan sa aquatic training nga gipahigayon isip kabahin sa conditioning program sa atleta sa wala pa ang insidente, nihangyo si Monday sa publiko nga magpabiling malinawon, respetohon ang kaguol sa pamilya, ug dili magdali sa paghukom samtang nagpadayon pa ang opisyal nga imbestigasyon.
Sa katapusan, nagpadayag si Monday sa iyang lalom nga pahasubo sa pamilya ni Adili.
Bisan wala na kini, magpabilin sa handumanan sa NEU community ang iyang ehemplo ug dedikasyon isip usa ka dungganong estudyante ug atleta.
