PROVINCE OF CEBU- Miabot na sa probinsya sa Sarangani ang relief assistance gikan sa Cebu Provincial Government ubos sa bandila nga “From the People of Cebu” aron motabang sa mga komunidad nga grabeng naapektuhan sa kusog nga linog.
Ang hinabang, nga gidala pinaagi sa duha ka wing van trucks, naglangkob sa 500 ka family food packs, 500 ka kahon sa bottled mineral water, 500 ka hygiene kits, 500 ka sleeping kits, ug 432 ka kahon sa ready-to-eat meals (MREs).
Gawas sa mga relief goods, gipahibalo ni Gov.Pamela ‘Pam’ Baricuatro nga ang Gobyerno sa Probinsya sa Sugbo naggahin og ₱10 milyon nga ayuda pinansyal alang sa General Santos City, nga nakasinati og dakong kadaot tungod sa magnitude 7.8 nga linog nga miigo sa Sarangani sa miaging semana.
Matud pa niya, makadawat usab og pinansyal nga tabang ang ubang local government units nga naapektuhan sa maong kalamidad.
Una nang miabot sa General Santos City ug sa Sarangani Province ang mga kawani sa Provincial Disaster Risk Reduction and Management Office (PDRRMO), nga gipangulohan ni Ret.Col. Dennis Pastor, aron sugdan ang on-ground relief operations.
Samtang, usa ka water tanker truck gikan sa Probinsya sa Sugbo ang nagpadayon na sa paghatag og serbisyo sa mga apektadong komunidad, nga mitabang sa pagsulbad sa kakulang sa suplay sa tubig samtang ang mga residente nagpadayon sa ilang pagbangon ug rehabilitasyon human sa linog.
