PROVINCE OF CEBU- Nanawagan ang Provincial Veterinary Office (PVO) sa dugang pang mga mag-uuma sa kahayopan sa lalawigan sa Sugbo nga magparehistro ug mopahimus sa tinuig nga libreng insurance nga gipaluyohan ug gigastohan sa Kagamhanan sa Probinsya sa Sugbo.
Gipahayag ni Dr. Mary Rose Vincoy nga ang paghatag og libreng insurance usa lang sa mga nag-unang serbisyo sa probinsya, inabagan sa Philippine Crop Insurance Corporation (PCIC).
Tuyo sa maong programa nga matabangan ang mga mag-uuma nga makabangon ug mapadayon ang ilang panginabuhian kung ugaling mamatyan sila sa ilang mga binuhing hayop tungod sa mga natural nga katalagman.
Gidugang ni Vincoy nga ang mga makuha nga indemnity check o bayad ipangalan direkta sa mga mag-uuma aron masiguro nga ang tibuok kantidad mapunta gayod sa pagpahiuli sa ilang panginabuhian.
Alang sa mga interesado, ang mga form mamahimong makuha sa mga Municipal Agriculture Office (MAO) ug City Veterinary Services sa ilang tagsa-tagsa ka dapit.
Sa laing bahin, milihok na usab ang PVO alang sa mga pagpangandam batok sa hulga sa El Niño nga posibleng moigo ug moapekto sa sektor sa kahayopan ug agrikultura sa Sugbo.
Gibutyag ni Dr. Vincoy nga gihimo na ang mga tigom ug koordinasyon uban sa mga municipal agriculturists ug livestock coordinators sukad pa niadtong Marso ning tuiga.
Gawas niini, nag-preposition o nag-andam na daan ang PVO og mga multi-vitamins, mineral, ug mga antibiotic para sa mga kahayopan nga daling matakdan og mga sakit tungod sa grabeng hulaw.
