Nibiya ang delegasyon sa Iran sa usa ka Swiss venue diin gihimo ang mga panagsulti nga nagtumong sa pagtapos sa gubat sa Middle East, human gihulga ni US President Donald Trump ang Islamic Republic tungod sa giingong pagsuporta niini sa grupong Hezbollah sa Lebanon.
Sumala sa report sa state media sa Iran nga IRNA, mibiya ang delegasyon sa Iran sa Bürgenstock Resort human sa ilang pakigkita sa delegasyon sa Qatar, nga nagsilbing usa sa mga tigpataliwala sa negosasyon.
Sa samang higayon, gibalik ni Trump pinaagi sa iyang post sa X (kanhi Twitter) ang iyang mga pasidaan ug pahayag batok sa Iran.
Bisan pa sa maong hitabo, usa ka diplomat nga adunay kahibalo sa panagsulti mipasabot nga wala hingpit nga mibiya ang Iran sa negosasyon ug nagpabilin gihapon nga “nakiglambigit” sa proseso.
Kaniadto, gihulga ni Trump nga atakehon ang Iran kung dili niini hunongon ang iyang gitawag nga suporta sa mga “proxy” nga grupo sa Lebanon nga giakusahan nga hinungdan sa kagubot sa rehiyon.
Mitubag ang Iran pinaagi ni Mohammad Bagher Ghalibaf, ang chief negotiator sa Iran, nga mipahimangno sa Estados Unidos nga mag-amping sa mga pahayag tungod kay andam ang armadong pwersa sa Iran sa pagresponde.
Samtang, sumala sa usa ka senior US diplomat, gilauman nga magpadayon ang negosasyon tali sa Estados Unidos ug Iran sa Lunes sa gabii.
Nagsugod ang panagsultihanay sa US-Iran niadtong Domingo human nagkauyon ang duha ka partido sa miaging semana nga maningkamot nga makab-ot ang kasabutan sulod sa 60 ka adlaw aron tapuson ang gubat sa Middle East.
