Gipasabot sa Commission on Human Rights (CHR)-7 nga premature o sayo pa kaayo ang mga panawagan nga ipaubos ang minimum age of criminal responsibility sa nasud tungod kay wala pa gani hingpit nga napatuman ang Republic Act 9344 o ang Juvenile Justice and Welfare Act.
Sa pakighinabi sa Bombo News Team kang Atty. Arvin Odron, ang Regional Director sa CHR-7, iyang gisaysay nga daghan pa sa mga probisyon sa maong balaod ang wala masunod.
Matud niya, daghang mga local government units (LGUs) ug mga ahensya sa gobyerno ang napakyas pa sa paghatag sa tanang interbensyon, monitoring, ug rehabilitation programs nga gituyo sa balaod alang sa mga kabataang nalambigit o anaa sa risgo nga malambigit sa kriminalidad.
Gidugang niini, nga isip kabahin sa inter-agency body nga nag-monitor sa implementasyon sa Juvenile Justice and Welfare Act, giangkon sa opisyal nga nakita nila ang daghang kakulangan sa pagpatuman niini.
Lakip sa mga nag-unang suliran mao ang kakulang sa mga pasilidad (sama sa Bahay Pag-asa), kakuwang sa social workers, ug kakuwang sa mga programang makatabang sa mga bata nga makabalik isip produktibong miyembro sa katilingban.
Gipasabot usab ni Odron, nga dili sayon nga usbon ang balaod tungod kay kini kabahin sa pagtuman sa internasyonal nga obligasyon sa Pilipinas ubos sa United Nations Convention on the Rights of the Child (CRC).
Kung diin, ang maong kombensiyon naglatid og espesyal nga proteksyon alang sa mga menor de edad ug nag-awhag sa rehabilitasyon imbes nga silotan dayon pinaagi sa criminal justice system.
Gidugang ni Odron nga kasagaran sa mga batang nalambigit sa krimen nagagikan sa kabus ug problemadong pamilya diin kulang ang parental guidance ug suporta.
Tungod niini, kinahanglan nga lig-onon una ang mga intervention programs sa gobyerno aron matubag ang mismong gamut sa problema.
Gipahinumdoman usab sa direktor ang publiko nga adunay daghang ehemplo sa mga kabataan nga kaniadto nalambigit sa krimen apan nahimo nang produktibong miyembro sa katilingban human nakadawat sa hustong rehabilitasyon.
Kini nagpamatud-an lamang nga ang tumong sa balaod mao ang paghatag og ikaduhang higayon sa mga menor de edad.
Busa alang sa CHR-7, mas angay nga tutukan una sa kagamhanan ang hingpit ug epektibong implementasyon sa Juvenile Justice and Welfare Act sa dili pa hisgutan ang pag-amendar niini o ang pagpaubos sa edad sa criminal liability.
Ang maong pamahayag gihimo ni Odron taliwala sa mga nanggawas nga panawagan nga repasuhon ang maong balaod human sa nahitabong insidente sa pagpamusil sa usa ka tunghaan sa Tacloban City nga kinaingnan sa usa ka menor de edad.
