Gipaambit ni Senador Risa Hontiveros nga adunay mga indikasyon nga ang pagpamusil sa San Jose National High School sa Tacloban City kay na-impluwensyahan sa usa ka langyaw nga grupo.
Giila sa senador nga ang pagpamusil mahimong nalambigit o na-impluwensyahan sa gitawag nga “764 Network” diin kini nga grupo naggikan sa Texas, USA.
Sa Estados Unidos, ang 764 opisyal nga gitudlo isip usa ka delikado nga “global child exploitation enterprise”.
Sumala sa mga nasayran sa komite, ang modus operandi niini nga grupo mao ang pag-target sa mga mahuyang nga kabatan-onan sa internet. Gigamit nila ang mga chat function sa mga online gaming platform aron mahimong “adult groomer”.
Ingon man gi-brainwash ug gi-radicalize nila ang mga bata aron makahimo og bayolenteng mga buhat sama sa pagpamusil sa eskwelahan, paghimo og pornograpiya, ug pagdaot sa uban o sa ilang kaugalingon.
Samtang, giklaro usab ni Sen. Hontiveros atol sa hearing nga ang mga dula o ang gaming community dili ang kaaway niini nga isyu.
Iyang gihimakak ang peke nga balita nga nanawagan siya alang sa hingpit nga pagdili sa mga online game sama sa Roblox o GoreBox.
Hinunoa, iyang giingon nga ang tumong sa imbestigasyon sa Senado mao ang pagsusi kung giunsa paglapas ang mga panalipod sa mga digital platform.
Gusto usab sa komite nga mapanalipdan ang mga batan-ong Pilipino gikan sa mga malimbongon nga langyaw nga grupo nga naggamit sa mga online space aron ipakaylap ang kapintasan.
