Miabot na sa halos 2,025 ka mga tawo ang natalang dugang kamatayon (excess deaths) sa nasod sa France tungod sa grabeng heatwave nga nasinati sa tibuok Europa sukad niadtong miaging semana sa Hunyo, sumala sa mga opisyal sa public health.
Kini nagpakita og 30% nga pagsaka kon itandi sa miaging semana.
Sumala ni French Health Minister Stéphanie Rist, talagsaon ug makapakurat ang maong pagsaka sa gidaghanon sa mga namatay, ilabi na sa mga nag-edad og 45 pataas.
Nasayran nga niadtong Hunyo 24, natala sa France ang pinakainit nga adlaw sa kasaysayan sa nasod, diin misaka ang temperatura ngadto sa halos 41°C sa Paris, samtang ang katunga sa nasod gipaubos sa red heat alert.
Gilauman nga mosaka na usab ngadto sa 40°C ang kainit sa habagatang bahin sa France, hinungdan nga nagpagawas og red alert status ang gobyerno tungod sa hulga sa wildfires.
Sumala sa Copernicus Climate Change Service, ang Europa mao karon ang kontinente nga labing paspas nga nag-init sa tibuok kalibutan, diin doble ang kapaspas niini itandi sa global average.
Tungod niini, gilauman nga mas magkanunayon pa ang grabeng heatwave, kakuwang sa tubig, ug mga sunog sa lasang sa maong rehiyon.
