Nakasinati og dakong pagkawala sa kuryente ang Cuba human nahugno ang nasudnong power grid niini niadtong Lunes sa hapon, oras sa Cuba.
Sumala sa Unión Eléctrica de Cuba (UNE), ang tibuok sistema sa kuryente sa nasud kalit nga napalong, nga nakaapekto sa gibanabanang 10 milyon ka mga residente.
Padayon pa ang imbestigasyon sa mga awtoridad aron mahibal-an ang hinungdan sa hingpit nga blackout, apan ang balik-balik nga pagkawala sa kuryente dugay nang problema sa nasud.
Sa miaging mga bulan, kanunay nga nakasinati og brownout ang Cuba nga moabot gikan sa pipila ka oras hangtod sa pipila ka adlaw tungod sa karaan nga imprastraktura sa kuryente ug kakulang sa gasolina alang sa mga planta sa kuryente.
Misamot pa ang problema tungod sa nagkagrabeng krisis sa ekonomiya ug limitado nga suplay sa enerhiya sa nasud.
Sa wala pa ang tibuok blackout, gibanabana nga hapit 2/3 sa Cuba ang wala nay suplay sa kuryente.
Daghang Cubano ang naapektuhan sa pagkawala sa kuryente, ilabi na tungod sa grabeng kainit ug epekto niini sa adlaw-adlaw nga panginabuhi sama sa trabaho ug pag-eskwela.
