Gimarkahan sa mga dagkong kausaban sa pagpangulo ug pagkamiyembro sa mga komite ang tibuok konseho sa dakbayan sa Sugbo sa tinuig nga organizational restructuring.
Tungod sa maong lakang, nawad-an og gihuptang committee chairmanship si Vice Mayor Tomas Osmeña nga kanhi nangulo sa Committee on Education, Science and Technology, aron motutok na lamang sa iyang papel isip presiding officer ug sa pagdumala sa mga kalihokan sa barangay. Si Liga ng mga Barangay President Franklyn Ong ang mipuli sa pwesto ni Osmeña sa maong komitiba.
Gisaka usab ngadto sa mas taas nga posisyon ang bag-ong magbabalaod nga si Councilor Winston Pepito human makuha ang mayoriya nga boto aron mahimong bag-ong majority floor leader puli kang David Tumulak nga kauban ra niya sa partido.
Gawas sa iyang pagkapangulo sa Committee on Transportation, nadugang sa responsibilidad ni Pepito ang scholarship committee nga kanhi gikuptan ni Philip Zafra, ug ang LGBT and Family Affairs Committee nga kanhi gidumala ni ex-officio member Rhea Jakosalem.
Nagpabilin sa ilang mga pwesto sila si Councilor Joel Garganera isip first assistant majority floor leader, Pancresio “Francis” Esparis isip second assistant majority floor leader, ug Philip Zafra isip President Pro Tempore. Sa bahin sa minority bloc, nagpabilin si Sisinio Andales isip minority floor leader ug si Alvin Arcilla isip assistant minority floor leader.
Gipulihan ni Councilor Harold Go si Mikel Rama sa Committee on Labor, Employment, Cooperatives and Livelihood, dungag sa iyang kasamtangang pagdumala sa Committees on Trade, Commerce and Entrepreneurship, ug Urban Planning.
Samtang si Councilor Tumulak nagpabilin sa Committee on Budget and Finance ug Committee on Disaster Risk Reduction, Safety and Climate Change, samtang nadugang kaniya ang Health Committee nga kanhi gidumala ni Michelle Cellona.
Nagpadayon si Rama sa pagpangulo sa Committee on Laws, Ordinances and Styling, samtang si Councilor Pastor Alcover nagpabilin gihapon sa pagdumala sa Committees on Senior Citizens Affairs, Markets, Games and Amusement, ug Agriculture and Rural Development.
Wala usab mag-usab ang pagkapangulo sa ubang mga komite diin nagpabilin si Esparis sa Social Services, Jakosalem sa Youth and Sports Development, Harry Eran sa Public Services, Edgardo Labella II sa Infrastructure, Garganera sa Environment and Energy, ug Zafra sa Animal Welfare ug House Rules.
Lakip ang pipila ka miyembro sa minority bloc nagpabilin sa ilang pwesto sama ni Paul Labra sa Public Order, ug Nyza Archival sa Tourism, Arts and Culture, Sister Cities Relations, ug sa Big Brother Program.
Apan human sa re-organisasyon, ang ubang sakop sa minoriya nga sila si Cellona, Arcilla, Andales, ug Jose Lorenzo Abellanosa ang hingpit na nga wala nay gihuptan nga bisan unsang committee chairmanship.
