Gipadayag ni Atty. Rameses Victorious Gatchalian Villagonzalo, usa ka inilang Sugbuanong abogado ug accredited International Criminal Court (ICC) lawyer, ang iyang pagtuki nga mas nakuha sa prosekusyon ang bentaha batok sa habig sa depensa sa nagpadayong impeachment trial.
Matod pa niya, bisan og buot niyang hatagan og pasidungog ang kakugi ug paningkamot sa depensa, ang kamatuoran nagpabilin nga ang prosekusyon gihapon ang nakakuha sa bug-os nga puntos o “full point” sa unang testigo pa lang.
Gisundan pa kini sa ikaduhang testigo diin, alang kaniya, nakakuha gihapon og laing hingpit nga puntos ang prosekusyon.
Gipasabot sa maong ICC lawyer nga kung mo-evaluate na gani ang mga maghuhukom, ang ilang tan-awon mao ang kredibilidad sa mga testigo ug kung na-establisar ba niini ang mga mahinungdanong alegasyon (material allegations) nga anaa sa mga artikulo sa impeachment (articles of impeachment).
Nanawagan usab si Atty. Villagonzalo nga kung ugaling duna may gidapigan o personal nga pagbati ang mga maghuhukom, dili unta nila tan-awon kung asa sila nga partido o mithi nakapabor sa politika.
Sa iyang pagtapos, naglaum siya nga ang mga mambabatas ug senator-judges mag-focus lamang gayud sa mga gipresentar nga ebidensya ug dili sa politikanhong interes, samtang iyang gipakaylap nga ang kasamtangang iskor anaa na sa 2-0 pabor sa prosekusyon.
