Gisaysay ni Ramil Isogon, ang Bombo International News Correspondent sa United Kingdom, pinaagi sa pakighinabi kaniya sa Bombo Radyo Cebu, ang grabeng kaguol ug kapakyasan nga gibati karon sa mga sumosunod sa Team England human sila gipalagpot sa defending champion nga Argentina sa semi-finals sa nagpadayon nga FIFA World Cup 2026.
Nakuha sa Argentina ang kadaugan sa score nga 2-1 batok sa England didto sa Atlanta Stadium sa Georgia, United States, nga nagwagtang sa pangandoy sa England nga makasulod sa finals.
Matod ni Isogon, unang nakasulod og puntos ang England sa second half pinaagi sa goal ni Anthony Gordon. Apan gipakita sa Argentina ang ilang “never give up” nga mentalidad sa pagpanguna sa ilang superstar nga si Lionel Messi.
Dugang niya, mitabla ang dula pinaagi sa goal ni Enzo Fernandez sa ika-85 nga minuto sa second half, ug gisundan dayon kini sa laing krusyal nga goal ni Lautaro Martinez sa dili pa natapos ang dula aron silyohan ang 2-1 nga iskor.
Nunot niini, giisip nga usa ka “heartbreaking defeat” alang sa England ang maong dula matod ni Isogon.
Tungod niini, ang Argentina na usab ang moadto sa finals aron sangkaon ang Team Spain karong umaabot nga Domingo didto sa New York, New Jersey Stadium.
