Giangkon ni National Bureau of Investigation (NBI) Director Melvin Matibag nga ang iyang asawa, si Laguna 1st District Representative Ann Matibag, usa sa mga magbabalaod nga misuporta sa impeachment complaint batok kang Bise Presidente Sara Duterte.
Apan, giklaro ni Matibag atol sa husay nga ang trabaho sa iyang asawa isip kongresista lahi sa iyang papel isip pangu sa NBI.
Sumala niya, wala giimpluwensyahan sa iyang asawa ang iyang trabaho, ug giingon nga patas siya sa iyang mga katungdanan.
“Ang trabaho sa akong asawa isip magbabalaod hingpit nga bulag kanako, isip direktor sa National Bureau of Investigation,” dugang niya,” ingon ni Matibag human gipangutana sa ikawalong adlaw sa impeachment trial ni VP Sara.
Giingon usab ni Matibag nga miuyon siya nga motestigo human giimbitar sa House prosecution panel. Dugang niya nga andam usab siya nga motestigo alang sa depensa kung imbitahon.
“Sa akong nasabtan, sa pre-trial order, gilista usab ako sa depensa.” “Malipayon ko nga mosaksi alang sa depensa, kung ako tawagon,” ingon sa hepe sa NBI.
Samtang, gidepensahan sa House prosecution panel si Matibag. Sumala sa House prosecutor ug Bicol Saro Party-list Representative Terry Ridon, dili kinahanglan nga ipahibalo sa kongresista sa iyang asawa ang mga desisyon nga iyang gihimo isip usa ka napili nga representante sa iyang distrito.
Gipasiugda usab ni Ridon nga si Matibag ug ang iyang asawa adunay kaugalingon nga mga desisyon sa ilang tagsatagsa ka mga tahas, busa ang kredibilidad sa direktor sa NBI isip usa ka saksi dili angay kwestyonon tungod lang sa posisyon sa iyang asawa sa impeachment.
