Gihulagway ni House prosecutor ug Iloilo Rep. Lorenz Defensor ang testimonya sa duha ka kanhing Government bank branch managers sa impeachment trial ni Bise Presidente Sara Duterte bahin sa giingong sayop nga paggamit sa confidential funds isip usa lang ka “appetizer.”
Sumala ni Defensor, ang kanhing LandBank-Shaw branch manager nga si Violeta Constantino ug kanhing LandBank-DepEd branch manager nga si Nenita Camposano parehong naghulagway sa pag-encash sa daghang kantidad sa mga tseke nga “unusual.”
Miingon siya nga kini magsilbi nga pasiuna sa dugang nga ebidensya nga ipresentar sa prosekusyon aron pamatud-an ang pagbudhi sa pagsalig sa publiko ug ang tinuyo nga paglapas sa Konstitusyon.
Atol sa hearing, gikumpirma ni Constantino ang pag-encash sa upat ka tseke gikan sa Office of the Vice President nga mokabat sa P500 milyon, samtang si Camposano nagpamatuod sa pag-encash sa tulo ka tseke gikan sa Department of Education nga mokabat sa P112.5 milyon. Kini kabahin sa P612.5 milyon nga confidential funds nga gisusi sa impeachment trial.
Samtang, ang tigpamaba sa House prosecution ug Lanao del Sur Rep. Zia Alonto Adiong miingon nga dili lang ang kantidad apan lakip na ang pamaagi sa pag-encashment ang angayng tagdon.
Matod niya nga ang regular nga iskedyul, makanunayon nga kantidad, ug sayo nga koordinasyon sa bangko nagpakita og klaro nga sumbanan nga sukwahi sa naandan nga operasyon sa mga intelligence fund.
