Gihatagan og katin-awan ni DPWH Cebu 6th District Engineer Gumer Castillo, ang mga katawhan nga naka-kwestiyon kon nganung gi-aspalto ang usa ka kontreto ug giingong anaa sa maayong kondisyon nga karsada sa A. S. Fortuna Street sa Dakbayan sa Mandaue.
Matod ni Engr. Castillo, sa buhatan sa Department of Public Works and Highways adunay Central Office, kinsa mao ang mo validate sa kondisyon sa karsada labi na kadtong mga nalangkob sa National Road.
Gidugang niya, basi sa road and bridge inventory sa DPHW Central Office, ang road condition sa A.S Fortuna, anaa na sa failed condition, hinungdan nga gikinahanglan na kini pugngan (prevent) para dili modako ang kadaot sa existing nga konretong dalan, partikular na ang mga liki-liki.
Dugang pagpasabot ni Engr. Castillo, mao kini ang ilahang standard isip kabahin sa preventive maintenance sa konkretong dalan, hinungdan nga aduna kini panginahanglan nga e-aspalto ilabi na nga dali kini ang pagtrabaho ug dili makahatag og pagkabarda sa mga motorista.
Dungan niini, nangayo siya og despensa sa LGU sa dakbayan sa Mandaue sa ura-urada nilang pag-implementar sa maong proyekto tungod kay matod niya, tungod sa dinalian mando usab nga padalian operasyon sa DPWH.
