Hingpit nang gitanggal sa MAHARLIKA Pilipinas Basketball League ang Bacolod Masskara Warriors.
Kini human sa giingong game-fixing sa ilang dula batok sa Bulacan niadtong Martes, Hulyo 28, diin ang Bacolod wala makapuntos sa katapusang walo ka minuto ug nakahimo og unom ka turnovers.
Dugang pa, daghang mga magduduwa ug coach sa Masskara Warriors ang gihatagan usab og permanent bans.
Sa maong lakang, matod pa buot sa MAHARLIKA nga mapadayon ang integridad ug kredibilidad sa dula.
Ang Bacolod mao ang ikaduhang team nga permanente nang gitang-tang sa MPBL, ang una mao ang Iloilo United Royals tungod sa gidudahang posibleng game-manipulation ug uban pang mga kalapasan.
Subay niini, pormal nga gihangyo ni Mayor Greg Gasataya ang Maharlika Pilipinas Basketball League (MPBL) nga mohimo og bug-os ug diha-diha nga imbestigasyon sa maong tungod sa mga alegasyon sa posibleng game-fixing ug mga aksyon nga posibleng nakadaot sa reputasyon sa siyudad.
Samtang, mipadayag sa iyang komento usab ang MPBL Founder ug Chairman nga si Manny Pacquiao human sa pagdili sa liga sa mga magduduwa sa Bacolod MassKara ug pagkansela sa ilang season tungod sa mga alegasyon sa game fixing ug manipulation.
Nanawagan siya sa mga magduduwa nga makigkompetensya nga may integridad ug pagkamatinud-anon.
