Gisaway ni Vice President Sara Duterte ang kasamtangang kahimtang sa journalism sa Pilipinas, human sa iyang pagbisita sa iyang amahan nga si kanhi Presidente Rodrigo Duterte sa The Hague.
Sa usa ka interbyu sa The Hague, gipadayag ni VP Sara nga layo ra kaayo ang kalidad sa journalism sa Pilipinas kon itandi sa international media.
Matod sa Bise Presidente, mas maayo ang pamaagi sa international media sa pagkuha, pagpanukiduki, ug pagpresentar sa mga balita.
Gihimo ni Duterte ang maong pamahayag human siya gisukna bahin sa pipila ka media outlets nga giingong nagkuha sa iyang mga pahayag nga gawas sa konteksto o out of context, nga matud niya nakahatag og negatibong hulagway kaniya ug sa iyang pamilya.
Gitataw usab niya nga dili unta kwarta ang nag-unang tumong sa journalism, tungod kay kon kini ra ang giapas, lisod nga makab-ot ang tinuod nga kausaban sa nasod.
Dugang pa ni Duterte, dako og tabang ang social media tungod kay naghatag kini og kahigayonan sa publiko nga makakita sa nagkalain-laing perspektibo ug sa ilang kaugalingong pamaagi sa pagtan-aw sa mga panghitabo.
Gipadayag usab niya ang iyang kabalaka sa giingong pagkahunlak o pagbag-o sa mithi ug prinsipyo sa pipila ka mga Pilipino, hinungdan nga nanawagan siya sa paghatag og bili sa mga mithi nga nagpakita og kabayanihan, disiplina, ug kalig-on.
