CENTRAL VISAYAS- Nagsugod na ang pagsaka sa dengue cases sa Sugbo tungod sa pagsugod sa ting-ulan, apan wala pa kini makaabot sa lebel nga mahimong ideklarang outbreak, matod ni Dr. Jonathan Lim sa Pediatric Infectious Disease Society of the Philippines (PIDSP).
Sumala ni Lim, kasagarang mosaka ang kaso sa dengue matag Hulyo hangtod Oktubre tungod sa pagdaghan sa mga lugar nga mapangitlugan sa Aedes aegypti lamok.
Kasagarang matakdan niini ang mga bata nga nag-edad og 6 hangtod 10 anyos.
Bisan pa nga adunay mga lugar sama sa Toledo City nga nagtala og taas nga kaso, wala pa kini gideklarang outbreak.
Giawhag ni Lim ang publiko nga magpakonsulta dayon kon adunay hilanat nga giubanan og grabeng labad sa ulo, pagsuka, kasakit sa tiyan, o kaluya sa lawas.
Gipahinumdoman niya ang publiko nga sundon ang 5S strategy sa Department of Health pinaagi sa paglimpyo sa palibot, pagtangtang sa mga sudlanan nga matigoman og tubig, ug paglikay sa mga dapit nga daghang lamok.
Gipasidaan usab ni Lim nga dili magpataka og fogging tungod kay dili kini epektibo kon walay klarong plano.
Ang fogging kinahanglan lamang ipatuman sa mga health authorities kon adunay nakumpirmang clustering sa dengue cases.
Gidasig ni Lim ang publiko nga magpadayon sa pagpugong sa dengue pinaagi sa pagwagtang sa mga dapit nga mapangitlugan sa lamok, paggamit og proteksyon batok sa pinaakan, ug pagpangayo dayon og medikal nga tabang kon adunay sintomas.
Mahitungod sa dengue vaccine, giingon ni Lim nga wala pa kini maaprubahan sa Philippine FDA.
Ang bag-ong bakuna nga TAK-003 naghulat pa sa regulatory approval bisan pa nga gigamit na kini sa ubang mga nasod.
