CEBU CITY- Giila ni Duterte panagutin lead convenor, former diplomat ug practicing lawyer Atty Jojo Lacanilao nga “very successful” alang sa prosecution ang testimonya ni Special Disbursing Officer (SDO) Gina Acosta isip unang hostile witness sa ika-16 nga adlaw sa impeachment trial.
Sa pakighinabi sa Bombo News team, matud ni Atty. Jojo, importante ang testimonya ni Acosta tungod kay iyang gipasiugda ang giingong papel ni Vice President Sara Duterte sa pag-disburse sa confidential funds.
Sumala sa abogado, si Acosta miingon nga si VP Sara ang nagmando kaniya nga ihatag ang tibuok kantidad sa confidential funds kang Colonel Lachica.
Gipunting ni Atty. Jojo nga isip SDO, responsibilidad ni Acosta nga masiguro nga husto ug legal ang pagpagawas ug paggamit sa public funds.
Kinahanglan usab, matud pa niya, nga adunay klarong physical ug financial plan sa dili pa ma-release ang confidential funds ug nga ang mga gasto kinahanglan motakdo sa gitakdang purpose sa pondo.
Gikuwestiyon usab niya ang pipila ka gasto nga gikatahong gi-charge sa confidential funds, lakip ang Christmas party ug uban pang gasto nga dili, sumala sa iyang pagpasabot, angay gamitan sa maong pondo.
Giingon ni Atty. Jojo nga ang testimonya ni Acosta mahimong makatabang sa prosecution sa pag-establisar kung adunay mas taas nga opisyal nga direktang nalambigit sa desisyon sa pagpagawas ug paggamit sa confidential funds.
Bisan pa niini, iyang giklaro nga kinahanglan gihapon nga susihon ang mga dokumento ug uban pang ebidensya aron mapamatud-an ang mga alegasyon nga gipatungha sa impeachment trial.
