Nakigtambayayong sa mga awtoridad ang amahan sa 15-anyos nga estudyante nga giingong responsable sa pagpamusil sa Ateneo de Zamboanga University, ug sa pagkakaron wala pay kaso nga giatubang batok kaniya, matod ni Interior and Local Government Secretary Jonvic Remulla.
Sumala ni Remulla, nag-inusara ang estudyante sa pagplano ug pagpatuman sa pag-atake ug walay kakunsabo o organisadong grupo nga nalambigit sa insidente.
Duha ka estudyante ang namatay sa pagpamusil, lakip ang suspek nga sa ulahi mipusil sa iyang kaugalingon.
Gamit sa suspek ang .40-caliber ug 9mm nga mga pistola nga gipanag-iya sa iyang amahan, usa ka empleyado sa Bureau of Customs (BOC).
Matod ni BOC Commissioner Ariel Nepomuceno, ang mga pusil gibilin sulod sa sakyanan nga gigamit sa pagdala sa estudyante ngadto sa eskwelahan.
Tungod niini, nakasulod ang mga armas sa campus.
Giklaro ni Remulla nga ang piskal ang magdesisyon kung manubag ba ang amahan, depende sa mga probisyon sa kasamtangang balaod ug sa resulta sa imbestigasyon.
Samtang nagpadayon ang imbestigasyon, temporaryong gikuha ang amahan sa iyang posisyon isip district commander sa BOC Enforcement and Security Services sa Zamboanga Port.
Padayon ang imbestigasyon sa mga awtoridad aron matino ang tibuok kahimtang nga mitultol sa insidente ug ang posibleng responsibilidad sa mga nalambigit.
