Nitingog ang kanhing talent manager ni Bea Alonzo nga si Shirley Kuan bahin sa mga alegasyon nga nalambigit siya sa pagkansela sa gikatakdang kasal sa aktres ug negosyanteng si Vincent Co sa Spain.
Sa usa ka press conference, gihimakak ni Kuan nga ni-resign siya isip manager ni Bea tungod kay wala siya gidepensahan sa aktres batok sa mga alegasyon.
Matud niya, ang “katapusang straw” sa ilang propesyonal nga relasyon mao ang dihang wala siya giimbitar sa usa ka kalihokan alang sa endorsement deal nga iyang gitabangan sa pagsiguro alang kang Bea.
Giklaro ni Kuan nga nagpabilin siyang hilom sa sinugdanan sa mga alegasyon nga siya ang hinungdan sa pagkansela sa kasal nila Bea ug Co sa Spain.
Matud niya, gihangyo siya sa aktres nga dili hisgutan ang isyu aron malikayan ang paggrabe sa kontrobersiya.
Gihimakak usab ni Kuan ang alegasyon nga iyang gibabagan ang kasal tungod sa pinansyal nga interes.
Gipaniguro niya nga kapin 30 ka tuig na siya sa showbiz ug wala siya nagsalig kang Bea alang sa iyang panginabuhi.
Sumala ni Kuan, direkta niyang gipangutana si Bea kon siya ba ang nagsugo nga kanselahon ang kasal, apan gihimakak kini sa aktres.
Gipaniguro usab ni Kuan nga aduna siyay mga “resibo” o ebidensya nga mosuporta sa iyang mga pahayag.
Samtang, wala pa mohatag og komento si Alonzo bahin sa mga pahayag sa iyang kanhing manager.
Kahinumduman nga gikatakda unta nga magpakasal sa Spain sila Alonzo ug Co niadtong Mayo 14, apan wala kini madayon human sa ilang panagsumpaki.
Sa ulahi, nagpakasal sila sa usa ka civil ceremony sa Makati.
