Gipahayag ni Atty. Rameses Victorius Gatchalian Villagonzalo, usa ka ICC-accredited lawyer, nga ang bisan unsang pagluwat og warrant of arrest batok sa usa ka ‘sitting’ o kasamtangang naglinkod nga Bise Presidente, parehas ni Vice President Sara Duterte, usa ka aksyon nga “premature, unconstitutional, ug illegal.”
Gitawag kini sa abogado nga usa ka legal nga opinyon nga gipundar alang sa akademikong diskusyon ug dili pinasikad sa politikanhong suporta sa bisan kinsang paksyon. Diin, base sa mga probisyon sa 1987 Philippine Constitution, ilabi na ang Article VII, Section 3, gipasabot ni Atty. Villagonzalo nga ang Bise Presidente adunay parehas nga mga kwalipikasyon ug pamaagi sa pagtangtang sa katungdanan sama sa Presidente.
Tungod kay ang Presidente adunay proteksyon batok sa mga kaso samtang naglingkod pa, kini nagpasabut usab nga ang Bise Presidente adunay parehas nga proteksyon batok sa mga kiha ug warrant samtang naa pa sa katungdanan.
Dugang pa niini, gipunting usab ni Villagonzalo ang Article XI, Section 2 sa Saligang Batas mahitungod sa Accountability of Public Officers, diin sumala sa maong probisyon, ang bugtong pamaagi sa pagtangtang o pagpasilot sa mga impeachable officers sama sa Presidente, Bise Presidente, mao ra gyud ang pamaagi sa impeachment.
Gipasabot sa abogado nga bisan kon tugotan ang pagpasaka og kaso, ang proseso sa balaod kinahanglan gihapon nga ipatuman o ipadayon human matapos ang termino sa maong opisyal, o kon siya matangtang sa pwesto pinaagi sa impeachment o pagtangtang.
Nipasidaan sab siya nga ang pagtugot sa pag-aresto sa mga impeachable nga opisyal samtang naa pa sila sa pwesto makamugna og kagubot ug kalibog sa gobyerno.
Gidugang usab ni Atty. Villagonzalo nga dako nga kakuwang sa kahibalo sa balaod o gross ignorance of the law ang pagpasaka og kaso batok sa Bise Presidente samtang naglingkod pa kini sa katungdanan.
Matod niya, kwestyonable usab kung ang kaso gisang-at pinaagi sa Department of Justice (DOJ) tungod kay ang mga reklamo nga may kalabotan sa mga opisyal nga aksyon o pahayag sa usa ka Bise Presidente kinahanglan nga moagi sa Office of the Ombudsman.
Dugang pa niini, gipatin-aw usab niya nga kakuwang sa hurisdiksyon ang Regional Trial Court (RTC) tungod kay ang Salary Grade sa Bise Presidente kay Grade 31, ug ang balaod nagtakda nga ang mga pampublikong opisyal nga adunay Salary Grade 27 pataas adto ra gyud ipasaka sa Sandiganbayan.
Base usab sa mga prinsipyo sa patas ug pagkaparehas, iyang gitino nga kon ang Bise Presidente tugotan nga kasuhan sa dili klaro nga mga hinungdan, siya usab adunay legal nga katungod sa paggamit sa balaod ug pagpasaka og kontra-kaso batok sa mga nagpasaka kaniya og kaso.
