Gidayeg ni Senador Bam Aquino ang mga batan-ong Pilipinong karatekas nga nagpasundayag ug nagdala og dungog sa nasud atol sa internasyonal nga kompetisyon sa Hangzhou, China.
Kini human sa 3rd Asian Karate Youth Open Championship and Training Camp nga gipahigayon sa Hangzhou niadtong Hulyo 2026.
Sa Senate Resolution No. 580 nga gisang-at ni Senador Bam Aquino, giila ang impresibong pasundayag sa delegasyon sa Pilipinas sa maong kompetisyon.
Lakip sa mga gipasidunggan mao ang 9-anyos nga si Romeo Viktor Enriquez, nga nakadaog og bulawang medalya ug nakasulod sa Top 5 sa Under-10 Male Kata category.
Ang 13-anyos nga kauban ni Enriquez nga si Raphael Mariano Herrera nakadaog usab sa iyang ikaduhang sunod-sunod nga bronze medal sa Under-14 Male Kata.
Samtang, si Ripley Tate Borromeo nakasulod sa Top 5 sa Under-12 Female Kata ug Top 7 sa Under-12 Female Kumite.
Sumala kang Senador Bam, ang karate dili lamang usa ka kompetisyon, apan usa usab ka paagi sa pagpalambo sa disiplina, paglahutay, pagkamapaubsanon, kalig-on ug pagsalig sa kaugalingon sa mga batan-ong Pilipino.
Matod pa niya, ang maong mga kalihokan naghatag usab sa kabatan-onan og oportunidad nga mapalambo ang ilang talento ug makigsangka sa internasyonal nga lebel.
