Nagpaabot ang pipila ka Pilipino sa Netherlands sa posibleng pag-abot sa pamilya ni kanhi President Rodrigo Duterte aron ipakita ang ilang suporta kaniya sa pagsugod sa husay sa International Criminal Court (ICC).
Matod ni Angel Axinto, Bombo International News Correspondent sa Netherlands, adunay mga Pilipino nga naglaum nga motambong ang mga anak ug ubang sakop sa pamilya ni Duterte aron mouban ug mohatag og suporta sa kanhi pangulo atol sa mga proseso sa korte.
Gipaambit usab ni Axinto nga adunay mga Pilipino nga nalipay nga makita pag-usab si Duterte sa publiko, human sa dugay-dugay nga panahon nga wala kini makita sa maong kahimtang.
Ang uban nagtambong sa maong lugar aron personal nga makita ang kanhi presidente.
Hinuon, namatikdan ni Axinto nga mikunhod na ang gidaghanon sa mga tawo nga nagpundok sa gitawag nga Duterte Street, kon itandi sa unang mga adlaw human ibutang si Duterte sa detention center sa Netherlands.
Samtang, nagpabilin ang presensiya sa seguridad sa maong lugar, apan wala namatikdi ang dugang nga pagpahugot sa seguridad atol sa pagpakita ni Duterte sa publiko.
Sa bahin sa kaso, gipahibalo sa Trial Chamber III sa ICC nga, base sa resulta sa medikal nga pagsusi sa mga eksperto, adunay kapasidad si Duterte sa pag-apil sa mga proseso sa husay.
Atol usab sa status conference, gipadayag sa kampo sa depensa ang ilang mga kabalaka bahin sa kadaghan sa mga ebidensiya.
Gihisgotan usab ang posibleng pag-adjust sa oras sa pagsugod sa husay, ilabi na tungod sa mga saksi nga anaa sa Pilipinas ug gilauman nga motestigo pinaagi sa live transmission.
