Gipasakaan na og kaso ang usa ka 43 anyos nga babaye nga giingong nangawat og pitaka nga adunay mga credit card ug migamit niini sa pagpamalit sulod sa usa ka mall sa Cebu City.
Ang suspetsado nga giilang si alyas nga “Karina,” usa ka dalaga ug walay trabaho, lumad nga taga-Quezon City apan temporaryong nagpuyo sa inn sa Colon Street, Cebu City.
Nasikop ang suspetsado atol sa follow-up operation sa kapolisan human nagpakitabang ang biktima nga giila sa alyas nga “Kristine,” 32 anyos, usa ka abogada ug residente sa Lapu-Lapu City.
Sumala sa impormasyon, nasikop ang suspetsado sulod sa usa ka mall sa Barangay Apas, Cebu City, human kini giingong mihimo og dili otorisadong transaksyon gamit ang credit card sa biktima.
Gidala dayon ang suspetsado ngadto sa Mabolo Police Station diin positibong giila siya sa biktima isip maoy giingong nangawat sa iyang pitaka nga adunay sulod nga mga government ID ug credit card.
Dugang pa, dili lang ang maong manlalaban ang miangkon nga nabiktima sa suspetsado human adunay labing menos tulo pa ka indibidwal nga mitungha sa estasyon sa kapolisan aron moreklamo human sa pagkadakop niini.
Sa bahin sa suspetsado, iyang gilimod nga siya ang nangawat sa credit card ug miangkon nga gisugo lamang siya sa laing tawo.
Samtang, giatubang na sa suspetsado ang mga kasong theft ug paglapas sa Republic Act 8484 o Access Devices Regulation Act of 1998, nga naglatid sa mga silot batok sa pipila ka ilegal nga paggamit ug kalihokan nga may kalabotan sa access devices sama sa credit card.
Samtang, nagpadayon ang pahimangno sa Police Regional Office 7 o PRO7 sa publiko nga mag-amping ug magbantay sa ilang mga personal nga butang ilabina karong nagkaduol na ang holiday season, diin kasagarang modaghan ang mga tawo sa mga shopping mall, merkado, terminal ug uban pang daghang tawo nga lugar.
Gidasig ang publiko nga siguruhong luwas ang ilang mga pitaka, cellphone, credit card, ug uban pang importanteng dokumento kon mogawas sa ilang mga panimalay. Likayan usab ang pagbutang sa mga importanteng butang sa mga bulsa o bag nga dali rang maabtan sa mga kawatan. Gipasidan-an usab ang mga mamalitay nga magmatngon sa ilang palibot ug dili magpasagad sa ilang mga gamit samtang nag-atiman sa mga gipamalit o naggamit sa ilang mga cellphone.
