Patay ang usa ka 28-anyos nga lalaki human gitigbas sa iyang kaugalingong amahan nga 53-anyos atol sa ilang panaglalis sulod sa ilang balay sa Sitio Proper, Barangay Guihob, lungsod sa La Libertad, Negros Oriental, pasado alas 7 sa gabii niadtong Miyerkules, Oktubre 21.
Sumala kang Police LT. Polinar Stephen Jaynard sa Negros Oriental Police Provincial Office naglalis ang mag-amahan sulod sa ilang pinuy-anan nga nahimutang sa lasangon nga bahin sa maong lungsod.
Ang ilang panaglalis maoy misangpot sa pagtigbas sa suspek sa iyang kaugalingong anak.
Mga mag-uuma ang mag-amahan, sumala sa kapulisan. Gipatin-aw usab ni Polinar nga wala makainom og makahubog nga ilimnon ang amahan sa dihang nahitabo ang insidente.
Human sa pagtigbas sa biktima, mitago sa lasang ang suspek.
Apan, niadtong Huwebes, Oktubre 22, pasado alas 12:55 sa udto, boluntaryo kining mitahan sa Libertad Municipal Police Station ug miangkon sa pagpatay sa iyang anak.
Gidala usab sa suspek ang sundang nga gituohang gigamit sa pagtigbas sa krimen atol sa iyang pagsurender sa kapulisan.
Base sa pahayag sa kapulisan, gipailalom ang suspek sa preliminary investigation human kini pasakaan og kasong parricide, o pagpatay sa kaugalingong ginikanan, anak, o ubang sakop sa pamilya nga gilatid sa balaod.
Sa pagka karon, padayon pa gihapon ang imbestigasyon sa kapulisan aron matino ang dugang detalye kalabot sa insidente.
