Gihatagan og kahigayunan nga makasugod og kaugalingong panginabuhian ang mga probationer human giturn-over ngadto kanila ang mga water vending machines ubos sa Livelihood Assistance, Building Awareness and Nurturing Growth o Project LABANG.
Ang maong kalihokan kabahin sa paningkamot sa Cebu Technological University (CTU), Department of Justice–Parole and Probation Administration (DOJ-PPA) ug Cebu Caritas nga matabangan ang mga probationer sa ilang pagbag-o sa kinabuhi ug pagbalik sa katilingban.
Nagtinabangay sa maong proyekto ang nagkalain-laing degree programs sa tunghaan, diin naghatag og technical skills training ang mga magtutudlo ug trainers gikan sa Technical-Vocational and Livelihood programs, lakip na ang welding technology ug electronic technology.
Gitudloan ang mga probationer sa paghimo, pag-assemble ug pagmentinar sa water vending machines nga mahimo nilang gamiton isip panginabuhian.
Gipasiugda sa project implementers nga ang tumong niini dili lamang ang paghatag og kagamitan ngadto sa mga probationer, kondili ang pagpalambo usab sa ilang responsibilidad, panaghiusa ug pagpakabana sa kaayohan sa ilang pamilya ug komunidad.
Gilauman nga pinaagi sa mga makina nga ilang nadawat, mapadayon nila ang mga kahanas nga ilang nakat-onan ug mahimo kining sinugdanan sa mas lig-on ug malungtarong panginabuhian.
Gipasiugda sa mga nagpatuman nga ang pagbag-o dili kutob sa pagtapos sa training, kondili kinahanglan nga mapadayon pinaagi sa paggamit sa ilang nakat-onan ug pagpakita nga mahimo silang produktibong kabahin sa katilingban. via Bombo Jemmaica Mayot





