PROVINCE OF CEBU-Nasunog ang abandonado nga duha ka andana nga balay pasado alas 7 sa buntag Mayo 25, sa Barangay Canduling, lungsod sa Ronda sa habagatang kasadpan sa Sugbo, human nga mi Sparks ang electrical wirings.
Matud pa ni FO2 George Lao, imbestigador sa Dumanjug Fire Station, nga gawas sa naugdaw nga balay, naugdaw usab ang usa ka multicab nga gipanag-iya sa Barangay Canduling, nga gi-parking duol sa balay.
Gibanabana ni Lao nga mokabat sa P75,000 ang danyos sa maong kabtangan.
Dugang pa, nga ang karaan nga abandonado nga balay gipanag-iya sa kapitan sa barangay Canduling, nga si Delia Berzosa.
Walay naangol sa maong sunog nga gikataho sa alas 7:03 sa buntag ug alas 7:10 sa buntag naabot sa sunog ang mga bombero sa Dumanjug Fire Station, ug kini napalong alas 8:05 sa buntag./
