CEBU CITY — Gi-kwestiyon ni Cebu City South District Representative Bebot Abellanosa ang giingong desperadong lakang ni House Speaker Alan Peter Cayetano kabahin sa 2021 budget ug pagsuspenso sa plenary session hangtud sa Nobyembre 16.
Sa interview sa Bombo Radyo ngadto ni Abellanosa, namahayag kini nga gi-sakripisyo ni incumbent House Speaker Cayetano ang 2021 budget hearing diin gi-omit o gitangtang ang debate, dayon gi-diretso og approve sa 2nd reading pinaagi sa usa ka motion.
Gihulagway ni Abellanosa nga gi-shortcut ni Cayetano ang budget arun sayu mahuman session og mobalik lang kini sa sunod buwan.
Dugang pa niini nga walay ganahan nga ma-delayed ang budget kay kini ang mahimong pondo sa gobyerno sa sunod tuig.
Apan kinahanglan usab, matud pa, nga ipaagi ang pagpasar sa nasudnong pondo sa saktong proseso.
Matud pa niini nga apektado ang kridebilidad sa budget tungod wala ni-agi sa saktong proseso ug ugaling ma-kwestiyonabli na kini og dili na magamit unya ma-apektuhan ang tibuok ahensya sa gobyerno kay na-delay ang pondo.
Gihimug-atan ni Abellanosa nga makita sa lakang ni Cayetano nga ang tumong og motibo lang niini kay magdugay pa kini isip house speaker.
Kung mahinumdoman nga nagkagubot ang kongreso tungod sa Term-sharing agreement tali nila Cayetano ug ni Marinduque Representative Lord Alan Velasco. /ekp/gn
